006 - Gerrit Lansink: Wus Abe t a wa voorts?

Wus Abe t a wa voorts? 

Vrogger hadn völ vootbalkiepers ne V op n trui. Biej Sportclub hadn alle spöllers zonne V. Iej zoln ja hoast geleuvn dat ze met elf kiepers kwamn antreadn. Woar ze noetieds met 4-3-3, 3-4-3 of zölfs 2-5-3 spölt, har Sportclub met 1-1-1-1-1-1-1-1-1-1-1, de 11-opstelling, op t veald könn stoan. Alle spöllers stief nöast mekaar, met n goalkieper der middn in. Zee dan mer es ne goal te maakn. Word iej naar drok met. Dan warn ze in juni 1958 lichtewal wa kampioen wordn.

Boavn rechts steet Joop Janssen, seend n joarhoonderd leenksboetn biej de Eanskers. Het meest bezeundere an em was (en is) dat hee nich oald wordn kan. I hope I die before I get old, zeengt The Who in My Generation. Met dat deanksel van Pete Townshend hef Joop van zien leavnsdaag nich wakker hoovn te lign.

Nee, dan Abe. Den was a oald toen e op de weerld kwam. En hee is nooit nich junger wordn. Hee har nich-beweegn tot sport maakt, n bal mos t almoal doon. In 1956 kwam Abe op t veeld van et Van Heekpark es n moal te valn. De krach van et ‘Ooooh!’ dat duur t geschrokn volk hen trok kwam harder an as t ‘Hoi! Hoi!’ noa nen banaanndreaibal van Abe in n leenkern boavnhook tieegn DOS oet Utrecht.

Leenks boavn, dreks nöast Abe, steet Arend van der Wel. As jeungske oet Noord-Amsterdam kwam e a vrog biej Ajax in t zuudoostn, aanderzieds van t IJ. Vuur of noa t oefn stök e vaak de bene oonder de toafel biej de Cruijffs dee zo kort biej De Meer wondn, da’j der in ene keer n bal hen konn schopn. Arend hef der heel wat brugn op-egetn. En kleann Johan veund t mer wat mooi dat nen grootn Ajax-spöller biej uur oaver de vloor kwam. Et dee em zeer dat Arend in 1955 noar Sportclub hen geenk. Mer et was wier mooi dat hee noe mangs op Eanske op-an kon, um lozeern te goan biej Arend. Va Manus, mo Nel en breur Henny kwamn noe en dan ok met.

Arend nöm Johan wa es met noar t oefn met de Sportclub-spöllers. Doar hef Cruijffie vast wa wat bälle schopt met Abe, in dee tied n bestn vootballer van oons laand. Hef e kekn of e Abe n bal duur de peute kon schoevn? Of was e te baank vuur nen trad oonder t gat van den keerl oet Freeslaand? Hef Abe Johan an t loopn kreegn? Hef e em rotbällekes toospöld en zeen dat t jeunkske doar nich zeek van wör? Zag Abe t grote a van zienn noakommer?

In 1962 was Friedrich Donenfeld treaner biej Sportclub. Doo’t ze den vroägn of Johan genn bestn vuur de klup zol wean, sprak den keerl ziene Dick-Rowe-weurde: ‘Dee jong is völs te schroal en te lieber vuur t vootbal, doar hebt wiej nich völ an.’

Dick Rowe, van de Decca plaatnmoatschop in Loondn, har kort doarvuur, in februari 1962, de Beatles gen kontrakt geund: ‘Veer jongs met dree gitaarn zint oet de tied.’ Rowe is der nich heel-en-dal as nen döl ofkomn, duurdat e a gauw vief jongs met dree gitaarn hef loatn teekn. De Rolling Stones wördn zo ne Decca-groep. En as man achter de knöppe in de studio hef e oonder meer het nummer Gloria met Them opnömn.

Zukke klaankn zint der van Donenfeld nich meer vernomn.


Gerrit Lansink
In de sproak van Ossel/Bekkum.

Op de Esso-foto van 1958 Sportclub Enschede, stoand v.l.n.r. A.K. v.d. Wel, Abe Lenstra, R. Brousek, A.J. Frölich, G. Voges, J.G. Janssen. Op de hoekn: W.J. Weustink, J.B. Odenthal, J. v.d. Wint, W. Busschers, M. Schaap.

Meer TKKR.TAAL op https://www.tkkr.nl/tkkrtaal/